पिंपरी-चिंचवड : पाेलीसनामा ऑनलाईन-अमली पदार्थ विरोधी पथकाने पिंपरी-चिंचवडच्या वाकड परिसरात तब्बल १० लाख रुपयांचा गुटखा पकडला आहे. ही कारवाई अमली पदार्थ विरोधी पथकाने बुधवारी पहाटे साडेचार च्या सुमारास केली आहे. याप्रकरणी वाहन चालकाला ताब्यात घेण्यात आले असून चालक हा पिंपरी-चिंचवड परिसरतील बड्या दुकानदारांना गुटख्याचा पुरवठा करत असल्याचा संशय अधिकाऱ्यांनी व्यक्त केला आहे. याप्रकरणी वाकड पोलिसात गुन्हा दाखल करण्याचे काम सुरू आहे.
विक्रम पेशोराम भक्तीयारपुरी वय-२९ रा.वैभव नगर पिंपरी अस ताब्यात घेतलेल्या चालकाचे नाव आहे. त्याला वाकड पोलिसांनी ताब्यात घेतले असून अन्न व औषध प्रशासन विभागाचे अधिकारी फिर्याद देत आहेत.
अमली पदार्थ विरोधी पथकाच्या अधिकाऱ्यांनी दिलेल्या माहितीनुसार,चालक विक्रम पेशोराम भक्तीयारपुरी हा पहाटे साडेचार च्या सुमारास टेम्पो क्रमांक एम.एच-१२ एम. व्ही-१४६३ हा भरधाव काळेवाडीहुन शिवराज नगरकडे संशयित रित्या जात होता. तेव्हा गस्त घालत असलेल्या पथकाचे अधिकारी आणि कर्मचाऱ्यांनी पाठलाग केला. त्याला काही अंतरावर जाऊन अडवले. टेम्पोची झडती घेतली असता टेम्पोमध्ये तब्बल १० लाख रुपयांचे विमल कंपनीच्या गुटख्याचे पॅकेट आढळून आले. तर साडेतीन लाख रुपयांचा टेम्पो जप्त केला आहे.
याची माहिती अन्न व औषध प्रशासनाच्या अधिकाऱ्यांना देण्यात आली त्यांनी तातडीने येऊन पंचनामा करत चालकाला वाकड पोलिसाच्या स्वाधीन केलं आहे. याप्रकरणी फिर्याद देण्याचे काम सुरू आहे. चालक विक्रम पेशोराम भक्तीयारपुरी हा शहरातील बड्या दुकानदारांना गुटखा पुरवत असल्याचा संशय व्यक्त केला जात आहे. अद्याप त्याने गुटखा कुठून आणला हे समजू शकले नाही. त्याचा तपास वाकड पोलीस करतील. ही कारवाई अमली पदार्थ विरोधी पथकाचे पोलीस निरीक्षक श्रीराम पोळ यांच्या मार्गदर्शनाखाली पोलीस उपनिरीक्षक वसंत मुळे यांच्या टीम ने केली आहे.