पाटील इस्टेट झोपडपट्टीतील गल्ली नंबर ३ मधील एका झोपडपट्टीला दुपारी एक वाजून १० मिनिटांनी आग लागली. या आगीची खबर मिळताच सुरुवातीला अग्निशामक दलाच्या १० गाड्या तातडीने घटनास्थळी रवाना करण्यात आल्या. मात्र, आग मोठ्या प्रमाणत असल्याने आणि सिलेंडरचे स्फोट होऊन आग पसरत असल्याने अग्निशमन दलाच्या आणखी गाड्यांना घटनास्थळी पाचारण करण्यात आले आहे. या संपूर्ण परिसरात धूराचे मोठ मोठे लोट उठताना दिसत आहेत. नदी काठाला लागून असलेल्या या गल्लीपर्यंत पोहचण्यात अग्निशामक दलाला मोठे शर्थीचे प्रयत्न करावे लागत आहेत. आग विझवण्यासाठी पुणे, पिंपरी-चिंचवड, खडकी कॅन्टॉनमेंटमधील अग्निशन दलाच्या गाड्यांची मदत घेण्यात आली आहे.
या आगीच्या ठिकाणी जाण्यासाठी अग्निशामन दलाच्या वाहनांना जागा मिळावी, यासाठी परिसरातील वाहतूक रोखण्यात आली आहे. वाहतूक शाखेचे १५ कर्मचारी तसेच स्थानिक पोलीस ठाण्याचे पोलीस कर्मचारी घटनास्थळी गर्दी रोखण्याचे काम करीत आहेत. तसेच आगीमुळं पिंपरीकडून पुण्याकडे येणारा खडकीच्या पुढचा रस्ता वाहतुकीसाठी बंद करण्यात आला आहे. त्यामुळं या रस्त्यावर वाहनाच्या लांबच्या लांब रांगा लागल्या आहेत. वाकडेवाडी पुलाखालील रस्ता आणि संगमवाडीकडे जाणारा रस्ताही वाहतुकीसाठी बंद करण्यात आला आहे.