प्रकृती बिघडल्याने अमित शहा एम्समध्ये दाखल

नवी दिल्ली : वृत्तसंस्था-भाजपचे राष्ट्रीय अध्यक्ष अमित शहा यांची प्रकृती बिघडल्याने त्यांना एम्समध्ये दाखल करण्यात आले आहे. अमित शहा यांना स्वाइन फ्लू झाल्याने तातडीने दिल्लीतील एम्समध्ये दाखल करण्यात आले आहे. एम्समध्ये दाखल करण्यात आल्याची माहिती अमित शहा यांनी ट्विटरच्या मध्यमातून दिली असून लवकरच आपली प्रकृती सुधारेल असा विश्वास त्यांनी व्यक्त केला आहे.

एम्समध्ये नामवंत डॉक्टर रणदीप गुलेरिया यांच्या देखरेखीखाली अमित शहा यांच्यावर उपचार सुरू आहेत. शहा यांना वॉर्ड क्रमांक ३०१ मध्ये दाखल करण्यात आलेले आहे, अशी माहिती सूत्रांनी दिली. दरम्यान, अमित शहा यांना रुग्णालयात दाखल करण्यात आल्याचे कळताच केंद्रीय गृहमंत्री राजनाथ सिंह यांनी फोन करून शहा यांच्या तब्येतीबाबत माहिती घेतली. रेल्वे राज्यमंत्री मनोज सिन्हा यांनीही ट्विटरच्या माध्यमातून शहा यांच्या प्रकृती स्वास्थ्यासाठी प्रार्थना केली.