विरोधकांची योजना फसली
संसदेच्या कनिष्ठ सभागृहात (हाउस ऑफ कॉमन्स) ब्रेक्झिट कराराच्या बाजूने २०२ मते तर विरोधात ४३२ मते पडली होती. हा निकाल पंतप्रधान थेरेसा मे यांना धक्का देणारा होता. त्यानंतर त्यांच्या विरोधात अविश्वास ठराव आणण्यात आला होता. मात्र, यात थेरेसा मे यांनी बाजी मारली आहे. सरकारविरोधात मांडण्यात आलेला अविश्वास ठराव नामंजूर झाला आहे. फक्त १९ मतांच्या फरकाने थेरेसा मे यांना सरकार वाचवण्यात यश मिळालं असून यामुळे विरोधकांची पुन्हा सार्वत्रिक निवडणुका घेण्याची योजना फसली आहे. अविश्वास ठराव मंजूर झाला असता तर १४ दिवसांत पर्यायी सरकार बनवावं लागलं असतं. तसं न झाल्यास मुदतपूर्व निवडणुकीला सामोरं जावं लागलं असतं.
२३ जून २०१६ रोजी झालेल्या सार्वमतात ब्रिटनच्या नागरिकांनी ५२ टक्के विरुद्ध ४८ टक्के अशा बहुमताने २८ देशांच्या युरोपीय महासंघातून बाहेर पडण्याच्या बाजूने कौल दिला होता. यामुळे युरोपीय महासंघात कायम राहण्याच्या मोहिमेचे नेतृत्व केलेल्या आणि सार्वमत पुकारलेल्या हुजूर पक्षाचे पंतप्रधान डेव्हिड कॅमेरून यांनी दुसऱ्या दिवशी राजीनामा दिला. त्यामुळे युरोपीय महासंघात राहण्याला पाठिंबा दिलेल्या अंतर्गत मंत्री थेरेसा मे या १३ जुलैला पंतप्रधान झाल्या.