याबाबत मिळालेली अधिक माहिती अशी की, केशव वारंग हे पत्नी, मुलासह राहत होते. त्यांचे किराणा माल दुकान आहे. सोमवारी रात्री आठच्या सुमारास ते दुसर्या मजल्यावर गेले. यावेळी घरासमोरील चौकात थर्टी फर्स्टचा जल्लोष सुरू होता. यावेळी वारंग यांनी बारा बोअर बंदुकीतून स्वत:वर गोळी झाडून आत्महत्या केली. जेवणासाठी मुलगा भरतने रात्री नऊ वाजता वडिलांना हाक मारली परंतु काहीच प्रतिसाद न मिळाल्याने त्याने वरच्या मजल्यावर जाऊन पाहिले. यावेळी वडील बेडवरच रक्ताच्या थारोळ्यात पडल्याचे आढळून आले.
भरतने आरडाओरड केल्याने ग्रामस्थांनी घटनास्थळी धाव घेतली. अचानक घडलेल्या या घटनेमुळे नातेवाईकांना धक्का बसला. शाहूवाडीचे पोलिस निरीक्षक मनोहर रानमाळे सहकार्यांसह तातडीने दाखल झाले. घटनास्थळावरील बंदूक ताब्यात घेतली. पंचनामा करून मृतदेह उत्तरीय तपासणीसाठी मलकापूर ग्रामीण रुग्णालयात हलविला. केशव वारंग घरगुती कारणातून अनेक दिवसांपासून निराश होते, असा जबाब नातेवाईकांनी दिला आहे. शाहूवाडी उपविभागाचे प्रभारी पोलिस अधीक्षक अनिल कदम यांनी घटनास्थळी भेट देऊन पाहणी केली.