छगन भुजबळ शेळीसारखा कधीही जगणार नाही, जगेल तो वाघासारखाच असा इशारा देतानाच माझ्या छातीत सहा महिने कळ आली नाही असं काही ट्रोलींग सुरु आहे. मी म्हणतो माझ्या छातीत कळ आली नाही परंतु माझ्या भाषणाने तुमच्या छातीत कळा का यायला लागल्या आहेत, अशा शब्दात ट्रोलींगच्या बातम्यांचा समाचार आपल्या खास भाषेत छगन भुजबळ यांनी नाशिकमधील घोटी येथील जाहीर सभेत घेतला.
ओबीसींचे आरक्षण रद्द करण्यासाठी कोर्टात अनेक याचिका दाखल करण्यात आल्या आहेत. ओबीसींचे आरक्षण कमी करण्याचा प्रयत्न यांचा आहे. अहो ९ न्यायाधीशांच्या खंडपीठाने ओबीसींचे आरक्षण दिले आहे असे सांगतानाच आज ओबीसींचे १७ टक्के आरक्षण राहिले आहे. तर ९ टक्केच नोकर्यांमध्ये आरक्षण भरलेले आहे अशी माहितीही आमदार छगन भुजबळ यांनी दिली.
राज्य करण्याची यांची लायकी नाही. यांची लवकरच घर वापसी करा असे आवाहनही आमदार छगन भुजबळ यांनी केले. राष्ट्रवादी काँग्रेस पक्षाच्या निर्धार परिवर्तन संपर्क यात्रेचा आजचा सहावा दिवस असून परिवर्तन यात्रेच्या दुसर्या टप्प्याची सुरुवात आजपासून नाशिक जिल्ह्यातून झाली. घोटी येथील दुसरी सभाही प्रचंड गर्दीमध्ये पार पडली.