जुन्या वादातून मुकुंदनगर मध्ये बाबा खान व समद खान यांच्या गटात तुफान हाणामारी झाली. तसेच मौलाना आझाद शाळेसमोरील परिसरात दुकाने व घरांवर जोरदार दगडफेक करून दहशत निर्माण करण्यात आली होती. त्यामुळे मुकुंदनगर परिसरात पहाटेपर्यंत तणावसदृश परिस्थिती होती. पोलिसांनी वेळीच घटनास्थळी धाव घेऊन परिस्थिती आटोक्यात आणली. या हाणामारीत एकाची प्रकृती गंभीर असून कॅम्प पोलीस ठाण्यात खुनाचा प्रयत्नासह दंगलीचे विविध कलमान्वये तब्बल पाच गुन्हे दाखल करण्यात आले आहेत. परिस्थितीचे गांभीर्य लक्षात घेऊन पोलिसांनी आरोपींची धरपकड सुरू केली. राष्ट्रवादी काँग्रेसचे नगरसेवक समद खान, माजी नगरसेवक मुजाहिद कुरेशी यांच्यासह एकूण पाच जणांना पुणे येथून पोलिसांनी अटक केली आहे. स्थानिक गुन्हे शाखेचे पोलीस निरीक्षक दिलीप पवार यांच्या नेतृत्वाखाली पोलीस उपनिरीक्षक ज्ञानेश फडतरे, रोहन खंडागळे, गणेश इंगळे, कर्मचारी योगेश गोसावी, बाळासाहेब मुळीक, मन्सूर सय्यद, दिगंबर कारखेले, रवी सोनटक्के, दीपक शिंदे, मल्लिकार्जुन बनकर, रवींद्र कर्डिले, संभाजी कोतकर आदींच्या पथकाने ही कारवाई केली.
याप्रकरणी जखमी जुनेद याच्यावर सिटी केअर हॉस्पिटलमध्ये उपचार सुरू आहेत. मुकुंदनगर येथील दंगलीप्रकरणी पोलिसांनी आरोपींची धरपकड सुरु केली आहे. या दंगलीमुळे मुकुंदनगर परिसरात पोलिसांचा अतिरिक्त फौजफाटा तैनात करण्यात आला आहे. अपर पोलीस अधीक्षक जयंत मीना, पोलीस उपअधीक्षक संदीप मिटके, पोलिस उपधीक्षक प्रांजल सोनवणे, सहाय्यक पोलीस निरीक्षक संदीप पाटील आदींनी गुरुवारी रात्री उशिरापर्षंत मुकुंदनगर येथे थांबून दंगल नियंत्रणात आणली.